فقہ کیا ہے ؟ اور فقہ کی لغوی اور اصطلاحی تعریف کیا ہے؟

 (سوال نمبر 9)
فقہ کیا ہے ؟ اور فقہ کی لغوی اور اصطلاحی تعریف کیا ہے؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
السلام علیکم ورحمتہ اللہ وبرکاتہ
کیا فرماتے ہیں علمائے دین و مفتیان شرع متین مسئلہ ذیل کے بارے میں کہ فقہ کی لغوی تعریف اور اصطلاحی تعریف کیا ہے؟ نیز فقہا و اھل معرفت کے یہاں فقہ کی کیا تعریف ہے؟
شرعی رہنمائی فرمائیں جزاک اللہ خیرا کثیرا
سائلہ:- کنیز فاطمہ کانپور انڈیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نحمدہ و نصلی علی رسولہ الکریم
وعلیکم السلام ورحمتہ اللہ وبرکاتہ
الجواب بعونہ تعالیٰ عز و جل
اپ کا جواب بلترتیب موجود ہے 
1. فقہ کا لغوی معنی کسی شئ کا جاننا ہے ۔
2. فقہ کی اصطلاحی تعریف یہ ہے کہ فقہ وہ علم ہے جس میں احکامِ شرعیہ فرعیہ کا علم ان کے تفصیلی دلائل کے ساتھ حاصل کرنا ہے، 
3. فقہائے کرام کے نزدیک فقہ کی تعریف یہ ہے کہ احکام شرعیہ اور مسائل شرعیہ کا علم حاصل کرکے ان کو حفظ کرلینا،
4.اھل معرفت کے نزدیک فقہ کی تعریف یہ ہےکہ علم فقہ کو یعنی علم احکام شریعت کو عمل میں لانا ۔
جیسا کہ بہار شریعت میں صدر الشریعہ علیہ الرحمہ تحریر فرماتے ہیں کہ 
 لغت میں فقہ کے معنی ہیں کسی شے کا جاننا پھر یہ لفظ علم الشریعہ کے ساتھ خاص ہوگیا۔علماء اُصول کی اصطلاح میں علم فقہ کی تعریف یہ ہے کہ فقہ وہ علم ہے جس میں احکامِ شرعیہ فرعیہ کا علم ان کے تفصیلی دلائل کے ساتھ حاصل کیا جائے اور فقہاء کے یہاں علم فقہ کی جو تعریف بیان کی گئی ہے وہ یہ ہے کہ علم فقہ نام ہے احکامِ شرعیہ اور مسائل شرعیہ کا علم حاصل کرکے ان کو حفظ کرلینا اور اہل حقیقت و معرفت نے علم فقہ کی تعریف ان لفظوں میں بیان فرمائی ہے کہ علم فقہ کا مطلب ہے علم احکام شریعت کو عمل میں لانا۔ 
بقول سیدنا حسن بصری رضی اللّٰہ عنہ کے فقیہ تو وہی ہے جو دنیا سے اعراض کرے اور آخرت کی طرف راغب ہو اور اپنے عیوب پر نظر رکھے۔

(بحوالہ بہار شریعت جلد سوم حصہ 19 ص 1036 مکتبہ المدینہ)
واللہ ورسولہ اعلم باالصواب

◆ــــــــــــــــــــ۩۞۩ـــــــــــــــــــــ◆

کتبتہ:- کنیز گلزار ملت قادری شہر کانپور انڈیا

 21/ 1 /2024

◆ــــــــــــــــــــ۩۞۩ـــــــــــــــــــــ◆
تصحیح و تصدیق حضرت مفتی محمد مجیب قادری حنفی العربی دار الافتاء البرکاتی علماء فاؤنڈیشن شرعی سوال و جواب ضلع سرہا نیپال
22/1/2024